Գլխավոր էջԳլխավոր էջ
Քննչական կոմիտեի հասցեն
ք. Երևան, Մամիկոնյանց 46/5+374(11) 880-151
ԻՆՉՊԵ՞Ս ՀԱՍՆԵԼ

Բռնաբարություն, սպանություն, սպանության փորձ. նախաքննությունն ավարտվել է, գործն ուղարկվել դատարան

31.08.2015 11:35


ՀՀ քննչական կոմիտեի Լոռու մարզային քննչական վարչությունում ավարտվել է բռնաբարության, սպանության, սպանության փորձի և գողություն կատարելու դեպքերի առթիվ հարուցված քրեական գործի նախաքննությունը, որի շրջանակներում մեղադրանք է առաջադրվել 25-ամյա երիտասարդի:

Մինչդատական վարույթում ձեռք բերված ապացույցների համաձայն՝ 25-ամյա երիտասարդը՝ Ա.Ղավալյանը, ալկոհոլի ազդեցության տակ, 2014 թվականի սեպտեմբերի 18-ի երեկոյան՝ ժամը 20:30-ից մինչև 22:30-ն ընկած ժամանակահատվածում, մուտք է գործել իր ընկերոջ տուն: Նախապես իմանալով, որ այդ պահին տանը միայն նրա հորաքույրն է՝ բռնության գործադրմամբ բռնաբարել է նրան, սեքսուալ բնույթի բռնի գործողություններ կատարել, ապա կտրող-ծակող գործիքով բազմակի հարվածներ է հասցրել կնոջ մարմնի տարբեր մասերին և սպանել:

Այդ ընթացքում տուն է վերադարձել ընկերը և նկատել, որ տան բակի դարպասների դուռը ներսից փակ է, մինչդեռ այն սովորաբար բաց է եղել, քանի որ իրենց հետ ապրող հորաքույրն ունեցել է վատ լսողություն։ Տղամարդը հարևանությամբ բնակվող հորեղբոր առանձնատան բակով  մտել է իրենց  բակ և տան մուտքի մոտ՝ աստիճանահարթակի վրա, տեսել  օտար տղամարդու կոշիկներ, ապա նկատել, որ մուտքի դուռն ամբողջովին բաց է, իսկ տան գույքը՝ խառնված, հատակին՝ արյուն: Կասկածելով, որ տուն գող է մտել՝ ներս չի մտել, այլ շտապել է կանչել հարևանությամբ բնակվող ազգականներին և հարևաններին։ Պատուհանից նայելով՝ հեռուստացույցի լույսի տակ ճանաչել է Ա.Ղավալյանին և հասկանալով, որ Ա. Ղավալյանը հանցավոր նպատակով է բնակարան մուտք գործել՝ զայրացած պահանջել է դուրս գալ:

Նախնական քննության տվյալներով՝ Ա.Ղավալյանը, տանից վերցնելով 2 խոհանոցային դանակ, կիսամերկ դիմել է փախուստի՝ այդ ընթացքում խոհանոցային դանակով հարվածելով նաև ընկերոջ կրծքավանդակի առաջնային մակերեսի ձախ կեսի շրջանում և նրա առողջությանը պատճառել կյանքին վտանգ սպառնացող ծանր վնաս։

Ի վերջո, նրան հաջողվել է փախչել և Ճանապարհին հանելով նաև ջինսե տաբատն ու ներքնազգեստը՝ ամբողջովին մերկ  թաքնվել է ավագ դպրոցի նկուղում, որտեղ էլ հայտնաբերվել է իրավապահների կողմից։

Քննությամբ պարզվել է, որ Ա.Ղավալյանը  նախկինում կատարել է քրեորեն հետապնդելի այլ արարքներ ևս, Ռուսաստանի Դաշնության իրավապահ մարմինների կողմից հետախուզման մեջ գտնվել՝ մի խումբ անձանց կողմից ռուս կնոջը բռնաբարելու մեղադրանքով։

Ձեռք բերված ապացույցների համակցությամբ՝ Ա.Ղավալյանին առաջադրվել է մեղադրանք՝ ՀՀ քրեական օրենսգրքի 104-րդ հոդվածի 2-րդ մասի 12-րդ կետի, 34-104-րդ հոդվածի 1-ին մասի, 138-րդ հոդվածի 1-ին մասի, 139-րդ հոդվածի 1-ին մասի, 177-րդ հոդվածի 3-րդ մասի 1.1 կետի և 183-րդ հոդվածի 1-ին մասի հատկանիշներով ( սպանություն զուգորդված՝ բռնաբարությամբ կամ սեքսուալ բնույթի բռնի գործողություններով, սպանության փորձ, բռնաբարություն, սեքսուալ բնույթի բռնի գործողություններ, գողություն՝ բնակարան ապօրինի մուտք գործելով և ավտոմեքենային ապօրինաբար տիրանալն առանց հափշտակելու նպատակի):

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին, մեղադրական եզրակացութչունը հաստատվել է և գործն ուղարկվել դատարան։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։


Մեկնաբանություններ
Ձեր էլ.հասցեն մնում է գաղտնի