Գլխավոր էջԳլխավոր էջ
Քննչական կոմիտեի հասցեն
ք. Երևան, Մամիկոնյանց 46/5+374(11) 880-151
ԻՆՉՊԵ՞Ս ՀԱՍՆԵԼ

Ռեստորանահյուրանոցային համալիրում հարսանեկան խնջույքի մասնակիցների թունավորման պատճառը եղել են աղցանները

13.11.2015 18:26


ՀՀ քննչական կոմիտեի Կոտայքի մարզային քննչական վարչության վարույթում ավարտվել է ռեստորանահյուրանոցային համալիրում  հարսանեկան խնջույքի մասնակիցների թունավորման դեպքի առթիվ հարուցված քրեական գործի նախաքննությունը։ Կատարված քննչական և դատավարական այլ գործողությունների արդյունքում պարզվել է թունավորման աղբյուրը. մատուցված որոշ աղցանների մեջ հայտնաբերվել է ոսկեգույն ստաֆիլակոկ  /S.aureus/ ինֆեկցիոն հարուցիչ հանդիսացող մանրէն:

Նախնական քննությամբ պարզվել է, Կոտայքի մարզի Առինջ գյուղում գտնվող  ռեստորանահյուրանոցային համալիրում օգոստոսի 1-ին տեղի է ունեցել հարսանեկան արարողություն, որի ժամանակ մատուցվել են ընկերության խոհանոցում պատրաստված աղցաններ։

Նշանակված փորձաքննությունների եզրակացությունների համաձայն՝ «Հավի մսով», «Հազարի տերևներով և լոլիկով» ու «Տապակած սմբուկով և նռան հատիկներով» աղցանների մեջ առկա է եղել Ոսկեգույն ստաֆիլակոկ /S.aureus/ ինֆեկցիոն հարուցիչ հանդիսացող մանրէն, որն էլ  հարսանյաց հանդեսի մի շարք մասնակիցների մոտ առաջացրել է սննդային թունավորում։

Քրեական գործով պարզվել է, որ նշված համալիրում սանիտարահիգիենիկ պայմանների և սննդի անվտանգության համար պատասխանատու անձ է հանդիսացել ՍՊ ընկերության տնօրենը։ Մասնավորապես՝ ռեստորանի սննդամթերքի ձեռքբերման աշխատանքերի  հարցերով զբաղվել է  ընկերության տնօրենը։

Բացի այդ,  «Սննդամթերքի անվտանգության մասին» ՀՀ օրենքի 13-րդ հոդվածով սահմանված կարգով նրա վրա դրվել է նաև սննդի շղթայի օպերատորի սննդամթերքի անվտանգության համար պատասխանատու պաշտոնատար անձի պարտականությունները, այն է՝  «Սննդամթերքի հիգիենային ներկայացվող պահանջների տեխնիկական կանոնակարգը հաստատելու մասին» ՀՀ կառավարության 20.01.2011թ. թիվ 34-Ն որոշմամբ և «Հատկապես արագ փչացող սննդամթերքի պահպանման ժամկետները և պայմանները» N 2-III-4.4-1 սանիտարական կանոնները ու նորմերը հաստատելու մասին ՀՀ առողջապահության նախարարի 28.12.2001թ. թիվ 961 հրամանով սահմանված պահանջների պահպանելը:

Մինչդատական վարույթում ձեռք բերված ապացույցների հիման վրա՝ ընկերության տնօրենին՝ Ա. Հայրապետյանին, մեղադրանք է առաջադրվել ՀՀ քրեական օրենսգրքի 279-րդ հոդվածի 2-րդ մասի 2-րդ կետով:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ  ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:


Մեկնաբանություններ
Ձեր էլ.հասցեն մնում է գաղտնի