Հարգելի՛ պարոն Խաչատրյան,
Ջերմորեն շնորհավորում եմ Ձեզ և Ձեր ղեկավարած կառույցի բոլոր աշխատակիցներին հատուկ քննչական ծառայության կազմավորման 12-րդ տարեդարձի առիթով:
Հատուկ քննչական ծառայությունն իր կազմավորման օրից ի վեր կարևոր դերակատարում է ունեցել Հայաստանի Հանրապետությունում օրինականության հաստատման և իրավակարգի ամրապնդման, իրավունքի գերակայության ապահովման, հանցավորության դեմ պայքարի կազմակերպման գործում:
Լինելով անկախ, գերատեսչական շահերով չկաշկանդված պետական կառույց, Հատուկ քննչական ծառայությունը այսօր էլ իր կոչմանը հավատարիմ շարունակում է գործել օրինականության, օրենքի առաջ բոլորի հավասարության սկզբունքների հիման վրա երաշխավորվելով վարույթում քննվող գործերով նախաքննության օբյեկտիվությունը, բազմակողմանիությունն ու լրիվությունը, ինչպես նաև քրեական վարույթին ընդգրկված անձանց իրավունքների ու օրինական շահերի լիարժեք պաշտպանությունը:
Այսօր, առավել քան երբևէ, առանձնահատուկ կարևորություն է ձեռք բերում ՀՔԾ պատասխանատու դերակատարումը նախկինում կատարված հանցավոր իրավախախտումների բացահայտման ու քննության, մեղավոր անձանց պատասխանատվության ենթարկելու, արդարության հաստատման և պետությանը պատճառված վնասի վերականգնման բնագավառներում: Վստահ եմ, որ Ծառայության քննիչների մասնագիտական փորձի, արհեստավարժության և ընդգծված նվիրումի շնորհիվ Ծառայությունը կշարունակի պատվով կատարել իր պատասխանատու առաքելությունը իր գործունեությամբ էապես նպաստելու երկրում իրավապահ մարմինների հանդեպ հանրային վստահության աստիճանի բարձրացմանը:
Եվս մեկ անգամ շնորհավորելով Ծառայության կազմավորման տարեդարձի կապակցությամբ՝ մաղթում եմ ՀՔԾ բոլոր աշխատակիցներին ամուր առողջություն, ընտանեկան երջանկություն և նորանոր աշխատանքային հաջողություններ:
