Հարգելի պարոն Քյարամյան,

Շնորհավորում եմ Ձեզ և ՀՀ քննչական կոմիտեի ողջ անձնակազմին՝ ծառայողի օրվա կապակցությամբ:

Այսօր մենք ապրում ենք հարափոփոխ աշխարհում և արմատական հեղափոխական բարեփոխումներ իրականացնող Հայաստանում: Այս իրողությունը նոր, բարդ, բայց և պատվով հաղթահարելի մարտահրավեր է մեր երկրի բոլոր պետական կառույցների, հատկապես՝ իրավապահ համակարգի մարմինների համար:

Հասարակական հարաբերությունների զարգացման և տեխնոլոգիական առաջընթացի արդի ժամանակաշրջանում աշխարհում աներկբա փոփոխվում են հանցավորության պատկերն ու շարժընթացը, ի հայտ են գալիս հանցավոր գործունեության նոր տեսակներ ու կատարման եղանակներ՝ նպաստելով հանցագործությունների քննությանն ու բացահայտմանը հակազդող դրսևորումների ձևավորմանը:

Նոր իրականությունը ենթադրում է, որ Հայաստանի Հանրապետության պետական մարմիններն առերեսվելու և անտարակույս դիմակայելու են ժամանակակից մարտահրավերներին:

Համոզված եմ, որ ՀՀ քննչական կոմիտեն ժամանակի այս քննությունը կհանձնի պատվով:

Վստահեցնում եմ, որ ՀՀ ազգային անվտանգության ծառայությունը մշտապես պատրաստակամ է համատեղ ուժերով լուծելու իրավակարգի առջև ծառացած խնդիրները՝ ի շահ մեր պետականության և ժողովրդի:

Կրկին շնորհավորում եմ ՀՀ քննչական կոմիտեի ծառայողներին՝ տոնական օրվա առթիվ և մաղթում արգասաբեր աշխատանք՝ ի նպաստ մեր երկրում օրինականության հետագա ամրապնդմանն ու հանցավորության դեմ պայքարի արդյունավետության բարձրացմանը:

Բարի ընթացք ձեր ազգանպաստ առաքելությանը:

ՀՀ ԱԱԾ տնօրեն,
գեներալ-մայոր Ա.Աբազյան