ՀՀ քննչական կոմիտեի նախագահ Աղվան Հովսեփյանն այսօր ընդունել է ՀՀ-ում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադիին։

Ողջունելով հյուրին՝ ՀՀ ՔԿ նախագահը բարձր է գնահատել երկու երկրների իրավապահ մարմինների միջև համագործակցության՝ ձևավորված փորձը, մեխանիզմները և համոզմունք հայտնել, որ փոխվստահության մթնոլորտում գործակցությունն այսուհետ ևս կշարունակվի։

Շնորհակալություն հայտնելով ջերմ ընդունելության համար՝ դեսպանը կարևորել է արդյունավետ փոխգործակցությունը, Քննչական կոմիտեի՝ որպես ՀՀ նոր պետական կառույցի և ԻԻՀ քննչական մարմինների միջև համագործակցության զարգացումը։ Դեսպանը ՔԿ նախագահին հրավիրել է ԻԻՀ՝ իրանցի գործընկերոջ հետ քննարկելու համագործակցության նոր ուղղություններն ու առաջնահերթությունները։

Շնորհակալություն հայտնելով հրավերի համար՝ ՔԿ նախագահը իրանցի գործընկերոջը ևս հրավիրել է աշխատանքային այցով ժամանել Երևան։

Կողմերը քննարկել են երկուստեք հետաքրքրություն ներկայացնող հարցերի լայն շրջանակ և պայմանավորվել աշխատանքային կարգով շարունակել քննարկումները, այդ թվում՝ փոխադարձ այցելությունները կազմակերպելու ուղղությամբ, ինչը նոր խթան կհանդիսանա՝ երկու երկրների քննչական մարմինների համագործակցությունն առավել սերտացնելու, քրեական գործերով նախաքննության ընթացքում  տեղեկատվության փոխանակումն առավել արդյունավետ իրականացնելու համար։