Մեղադրանք է առաջադրվել 16-ամյա պատանուն՝ 18-ամյա երիտասարդին դանակահարելու համար
![Մեղադրանք է առաջադրվել 16-ամյա պատանուն՝ 18-ամյա երիտասարդին դանակահարելու համար Մեղադրանք է առաջադրվել 16-ամյա պատանուն՝ 18-ամյա երիտասարդին դանակահարելու համար](https://investigative.am/storage/files/2015/11/1448459349,8649.jpeg?token=b3dede641bbf0707005cb88b006395f2ed4ffb6b)
ՀՀ քննչական կոմիտեի Երևան քաղաքի Շենգավիթ վարչական շրջանի քննչական բաժնում ավարտվել է 16-ամյա տղայի կողմից 18-ամյա երիտասարդին դանակահարելու դեպքի առթիվ հարուցված քրեական գործի նախաքննությունը:
Նախաքննության ընթացքում պարզվել է, որ 2015 թվականի հունիսի 25-ին՝ ժամը 23:00-ի սահմաններում, իրենց շենքի բակում հարևանների վիճաբանությունը սաստել է 16-ամյա պատանին՝ պահանջելով ցածր խոսել: Նրա պահանջը դուր չի եկել հարևանին, որի համար վերջինս 16-ամյա պատանուն կանչել է 2-րդ հարկի հարթակ: Հանդիպման ընթացքում կողմերը պարզաբանել են իրավիճակը և հարթել այն, սակայն խոսակցությանը միջամտել է երրորդ անձը՝ 18-ամյա մի երիտասարդ։ Վերջինիս և 16-ամյա պատանու միջև առաջացել է վիճաբանություն, որի ժամանակ, նախաքննության տվյալներով, վերջինս խոհանոցային դանակով մեկ անգամ հարվածել է 18-ամյա երիտասարդի որովայնի շրջանին՝ որովայնի առաջնային պատի կտրած-ծակած թափանցող վերքի ձևով նրա առողջությանը պատճառելով ծանր վնաս։
Մինչդատական վարույթում ձեռք բերված ապացույցների հիման վրա՝ 16-ամյա պատանուն մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով (դիտավորությամբ առողջությանը ծանր վնաս պատճառելը):
Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: