ՀՀ քննչական կոմիտեն ամփոփել է 2024թ․ առաջին ինը ամիսների ընթացքում նախաքննությունն ավարտված, ինչպես նաև ընթացիկ քրեական վարույթներով հայտնաբերված՝ պետությանը, համայնքներին, իրավաբանական և ֆիզիկական անձանց պատճառված վնասների և քննության ընթացքում վնասների վերականգնման ուղղությամբ կատարված աշխատանքների արդյունքները։

Ըստ այդմ՝ ստորաբաժանումների կողմից 2024թ. 9 ամիսների ընթացքում միայն նախաքննությունն ավարտված քրեական վարույթներով պարզված՝ պատճառված ընդհանուր գույքային վնասը կազմել է 39.210.300.000 ՀՀ դրամ, որից 25.670.615.000 ՀՀ դրամը՝ պետությանը պատճառված վնասն է։

Իրականացված աշխատանքների արդյունքում վերականգնվել է ընդհանուր 9.722.138.000 ՀՀ դրամի վնաս: Ընդ որում՝  նախաքննությունն ավարտված քրեական վարույթներով վերականգնված վնասի նշված ցուցանիշը 2023թ․ նույն ժամանակահատվածի համեմատ ավելի է  2․366․046․000 ՀՀ դրամով կամ 34․5%-ով։

 Մասնավորապես, նախաքննության փուլում վերականգնվել է՝

• պետությանը պատճառված վնասից՝ 9.206.315.000 ՀՀ դրամը,
• համայնքին պատճառված վնասից՝ 31.422.000 ՀՀ դրամը,
• իրավաբանական անձանց պատճառված վնասից 236.035.000 ՀՀ դրամը,
• ֆիզիկական անձանց պատճառված վնասից՝ 248.366.000 ՀՀ դրամը։

Բացի այդ,  2024թ․ սեպտեմբերի 30-ի դրությամբ անավարտ վարույթներով ընթացիկ տարվա առաջին ինը ամիսներին վերականգնվել է ևս 24.725.582.000 ՀՀ դրամ, որից պետությանը պատճառված վնասից՝ 24.515.239.000 ՀՀ դրամ, իսկ համայնքին պատճառված վնասից՝ 25.796.000 ՀՀ դրամ: 

Այսինքն, 2024թ. առաջին 9-ը ամիսներին ՀՀ քննչական կոմիտեի ստորաբաժանումներում ավարտված և անավարտ վարույթներով հայտնաբերված գույքային  վնասից վերականգնվել է ընդհանուր 34.447.720.000 ՀՀ դրամ, որից պետությանը՝ 33.721.554.000 ՀՀ դրամ:

Վերականգնման հիմնական մասը ապահովվել է հարկեր վճարելուց չարամտորեն խուսափելու դեպքերի առթիվ քննվող քրեական վարույթների շրջանակներում:

Ընդհանուր առմամբ, փաստացի 2024թ․ առաջին 9 ամիսներին ՀՀ ՔԿ ստորաբաժանումներում քննված և քննվող քրեական վարույթներով վերականգնվել է պետությանը, համայնքներին, իրավաբանական կամ ֆիզիկական անձանց պատճառված գրեթե նույնքան վնաս, որքան ամբողջ 2023թ․ ընթացքում (34մլրդ 756մլն ՀՀ դրամ)։