Ավազակային հարձակում՝ Վերին Պտղնի գյուղում. հարուցվել է քրեական գործ
![Ավազակային հարձակում՝ Վերին Պտղնի գյուղում. հարուցվել է քրեական գործ Ավազակային հարձակում՝ Վերին Պտղնի գյուղում. հարուցվել է քրեական գործ](https://investigative.am/storage/files/2019/08/1565091338,6542.jpeg?token=72c1bbdaf6fcc1660086641760edc976b2ccb6f5)
ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնում հարուցվել է քրեական գործ՝ Վերին Պտղնի գյուղում տեղի ունեցած ավազակային հարձակման դեպքի առթիվ:
2019թ. օգոստոսի 06-ին՝ ժամը 10:00-ին, Կոտայքի մարզի Վերին Պտղնի գյուղի բնակչուհին հաղորդում է տվել այն մասին, որ նույն օրը՝ ժամը 08:20-ի սահմաններում, անհայտ անձը՝ դիմակավորված, տան պատշգամբի դռնից մուտք է գործել տուն, հարվածներ հասցնելով իրեն՝ պատճառել է մարմնական վնասվածքներ և դանակի սպառնալիքով հափշտակել կանխիկ գումար, ոսկյա զարդեր ու դիմել փախուստի:
Դեպքի առթիվ ՀՀ քննչական կոմիտեի Կոտայքի մարզային քննչական վարչության Աբովյանի քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 2-րդ, 3-րդ և 4-րդ կետերով: Վերին Պտղնի գյուղի բնակչուհին ճանաչվել է տուժող:
Նախաքննության ընթացքում կատարվել են մի շարք քննչական գործողություններ՝ դեպքի վայրի զննություն, առգրավումներ:
Քրեական գործով էական նշանակություն ունեցող հանգամանքներ պարզելու նպատակով նշանակվել են դատաբժշկական և դատակենսաբանական փորձաքննություններ:
Միջոցներ են ձեռնարկվում՝ դեպքի հանգամանքների օբյեկտիվ, լրիվ և բազմակողմանի քննությունն ապահովելու ուղղությամբ:
Հանձնարարություն է տրվել ոստիկանության համապատասխան բաժնին:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: