Բացահայտվել է բնակարանային գողության դեպքը
![Բացահայտվել է բնակարանային գողության դեպքը Բացահայտվել է բնակարանային գողության դեպքը](https://investigative.am/storage/files/2021/05/1620038513,6757.jpeg?token=f775ec1782a56e47491cd96fbd7c532d6d6fe812)
ՀՀ քննչական կոմիտեի Լոռու մարզային քննչական վարչությունում իրականացված քննչական և դատավարական այլ գործողությունների արդյունքում պարզվել են Ալավերդի քաղաքի 37-ամյա բնակչի կողմից կատարված բնակարանային գողության դեպքի հանգամանքները:
Քննությամբ ձեռք բերված փաստական տվյալների համաձայն՝ տղամարդը, ուրիշի գույքը գաղտնի հափշտակելու դիտավորությամբ, 2021թ. մարտի 1-ին` ժամը 11:30-ից մինչև 13:05-ն ընկած ժամանակահատվածում, տեխնիկական միջոցների գործադրմամբ լուսամուտի փեղկը բացելու եղանակով, ապօրինի մուտք է գործել Լոռու մարզի Շնող համայնքի Թեղուտ բնակավայրում գտնվող առանձնատուն և այնտեղից հափշտակել գումար, ոսկյա և արծաթյա զարդեր, բանկային քարտեր՝ պատճառելով զգալի չափերով գույքային վնաս:
Ձեռք բերված բավարար ապացույցների համակցությամբ՝ տղամարդուն մեղադրանք է առաջադրվել: Նրա նկատմամբ խափանման միջոց է ընտրվել կալանավորումը:
Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել է դատարան:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: