ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում քննություն է տարվում՝ «Սուրմալու» առևտրի կենտրոնում բռնկված հրդեհի բոլոր հանգամանքները պարզելու ուղղությամբ:

2021թ. ապրիլի 6-ին՝ ժամը 03:15-ին, ահազանգ է ստացվել այն մասին, որ «Սուրմալու» առևտրի կենտրոնում հրդեհ է բռնկվել:

Ահազանգի հիման վրա անմիջապես դեպքի վայր է մեկնել քննչական-օպերատիվ խումբը և ՀՀ ԱԻՆ հրշեջ-փրկարարական ջոկատի 16 մարտական հաշվարկ:

Դեպքի առթիվ նյութերի նախապատրաստման ընթացքում վերցվել են «Սուրմալու» առևտրի կենտրոնի տարածքում առկա տեսախցիկների տեսագրությունները, կատարվել է դեպքի վայրի զննություն, որի ընթացքում պարզվել է, որ հրդեհի հետևանքով, նախնական տվյալներով, այրվել են առևտրի կենտրոնի շուրջ 2000քմ տարածքի վրա գտնվող տարբեր տեսակի մեծածախ և մանրածախ առևտրով զբաղվող մոտ 20 տնտեսվարողների խանութներում եղած տարբեր տեսակի ապրանքներ:

Առաջ են քաշվել հնարավոր աշխատանքային վարկածներ, որոնք ստուգելու ուղղությամբ ձեռնարկվում են մեծածավալ գործողություններ: Հանձնարարություններ են տրվել հետաքննության մարմնին: