36-ամյա Ա.Նախչվանյանին ծանր մարմնական վնաս պատճառելու դեպքի առթիվ Աջափնյակ և Դավթաշեն վարչական շրջանների քննչական բաժնում քննվող քրեական գործով իրականացված նախաքննությամբ պարզվել են դեպքի մի շարք հանգամանքներ, առերևույթ հանցագործություն կատարած անձի ինքնությունը։

Քրեական գործով ձեռնարկված քննչական և դատավարական միջոցառումների արդյունքում պարզվել է, որ  2015թ. ապրիլի 05-ին՝ ժամը 09:30-ի սահմաններում, Երևան քաղաքի Հասրաթյան փողոցի 6-րդ շենիք դիմաց գտնվող խանութների առջև ավտոմեքենան կայանելու հարցի շուրջ վիճաբանություն է տեղի ունեցել Արմեն Նախչվանյանի և մեկ այլ քաղաքացու միջև, որի ժամանակ վերջինս դանակով հարվածել է Ա.Նախչվանյանին:

Նախաքննությամբ պարզվել է տվյալ քաղաքացու ինքնությունը և 10.04.2015թ. որոշում է կայացվել` նրան ՀՀ քրեական օրենսգրքի 112-րդ հոդվածով որպես մեղադրյալ ներգրավելու մասին։ Նրա նկատմամբ որպես խափանման միջոց է ընտրվել կալանավորումը և հայտարարվել  հետախուզում:

Նախաքննությունը շարունակվում է, միջոցներ են ձեռնարկվում հետախուզման մեջ գտնվող անձին հայտնաբերելու ուղղությամբ։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։