ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
                                                                ՔՆՆՉԱԿԱՆ ԿՈՄԻՏԵԻ ՆԱԽԱԳԱՀԻ

                                                                                  Հրաման՝ 

12.02.2018.  ք. Երևան  Թիվ N 9-Լ



Հիմք ընդունելով Հայաստանի Հանրապետության կառավարության 2017 թվականի մարտի 23-ի նիստի N 12 արձանագրային որոշմամբ հաստատված «Իրավական համաուսուցման, իրավական դաստիարակության և իրավաբանական կրթության համակարգի վերակառուցման հայեցակարգից բխող միջոցառումների» ծրագրի 3.5-րդ կետը, Հայաստանի Հանրապետության բարձրագույն ուսումնական հաստատություններում «Իրավագիտություն» մասնագիտությամբ ուսանողների համար պրակտիկայի կազմակերպման արդյունավետության նպատակով  և ղեկավարվելով «Հայաստանի Հանրապետության քննչական կոմիտեի մասին» Հայաստանի Հանրապետության օրենքի 12-րդ հոդվածի 2-րդ մասի 3-րդ կետով՝

                                                                       Հրամայում եմ՝

 1. Հաստատել՝

    Հայաստանի Հանրապետության քննչական կոմիտեում և Հայաստանի Հանրապետության քննչական կոմիտեի դեպարտամենտում պրակտիկա անցնելու կարգը` համաձայն N 1 հավելվածի:

2. Սույն հրամանի կատարման վերահսկողությունը հանձնարարել Հայաստանի Հանրապետության քննչական կոմիտեի նախագահի տեղակալ Ա.Ղամբարյանին:

3. Հրամանն ուղարկել Հայաստանի Հանրապետության քննչական կոմիտեի նախագահի տեղակալներին, Հայաստանի Հանրապետության քննչական կոմիտեի մարմինների և ստորաբաժանումների պետերին, Հայաստանի Հանրապետության քննչական կոմիտեի դեպարտամենտի ղեկավարին:



                                                                                                                                                                                                                                                                                                                                            Ա. Գ. Հովսեփյան

Հավելված N 1

Հայաստանի Հանրապետության

 քննչական կոմիտեի նախագահի

 « 12. 02. 2018 թ. N  9- Լ հրամանի

                                                                                Կ Ա Ր Գ

                                                 ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔՆՆՉԱԿԱՆ ԿՈՄԻՏԵՈՒՄ  
                                                                      ՊՐԱԿՏԻԿԱ ԱՆՑՆԵԼՈՒ

           I. ԸՆԴՀԱՆՈՒՐ ԴՐՈՒՅԹՆԵՐ


1. Սույն կարգով սահմանվում է Հայաստանի Հանրապետության քննչական կոմիտեում (այսուհետ՝ Կոմիտե) Հայաստանի Հանրապետության բարձրագույն ուսումնական հաստատություններում «Իրավագիտություն» մասնագիտությամբ ուսանողների (այսուհետ՝ Պրակտիկանտ)  համար անհատույց հիմունքներով պրակտիկա անցնելու կարգը:

2. Կոմիտեում և Կոմիտեի դեպարտամենտում պրակտիկայի կազմակերպումը նպաստում է Պրակտիկանտների նոր գործնական գիտելիքների ձեռքբերմանը, որի ընթացքում Պրակտիկանտն օժանդակում է քննիչին կազմակերպական-տեխնիկական խնդիրների իրականացման հարցում՝ գործնականում օգտագործելով իր տեսական գիտելիքները: 

3. Պրակտիկանտը Կոմիտեում և Կոմիտեի դեպարտամենտում պրակտիկա անցնելիս ծանոթանում է քննչական աշխատանքի կազմակերպմանը, քրեաիրավական և քրեադատավարական օրենսդրության նորմերի կիրառմանը, զարգացնում գործնական հմտությունները:

4. Պրակտիկանտ կարող է լինել 18 տարին լրացած, Հայաստանի Հանրապետության բարձրագույն ուսումնական հաստատության «Իրավագիտություն» մասնագիտությամբ բակալավրի կամ մագիստրոսի կրթական ծրագրով սովորողը, ով տիրապետում է հայերենին:

5. Կոմիտեում պրակտիկայի տեսակներն են՝ կարճաժամկետ և երկարաժամկետ: Կարճաժամկետ պրակտիկան անցկացվում է Կոմիտեի դեպարտամենտի արխիվում, իսկ երկարաժամկետ պրակտիկան՝ Կոմիտեի մինչդատական վարույթ իրականացնող մարմնում կամ ստորաբաժանումում:

6. Կարճաժամկետ պրակտիկայի տևողությունն է մինչև երկու շաբաթ, իսկ երկարաժամկետ պրակտիկայինը՝ առնվազն չորս շաբաթ:


     
      II. ՊՐԱԿՏԻԿԱՅԻ ԿԱԶՄԱԿԵՐՊՄԱՆ ԿԱՐԳԸ

7. Համապատասխան ուսումնական հաստատություններից ներկայացվում է Կոմիտեում և Կոմիտեի դեպարտամենտում պրակտիկա անցնելուն հավակնող ուսանողների անունը, ազգանունը, թվաքանակը, ժամկետները, երկարաժամկետ պրակտիկայի դեպքում՝ նախընտրելի տարածքային մարմինը կամ ստորաբաժանումը, որտեղ պետք է անցնի պրակտիկան և պրակտիկա անցնելու ակադեմիական ժամերը (կրեդիտները):

8. Պրակտիկայի անցկացումը կազմակերպում է Կոմիտեի դեպարտամենտի անձնակազմի կառավարման վարչությունը:

9. Պրակտիկան դադարում է եթե.

1) լրացել է պրակտիկայի ժամկետը,

2) առկա է տվյալ ուսումնական հաստատության համապատասխան գրությունը պրակտիկան դադարեցնելու մասին,

3) առկա է Պրակտիկանտի դիմումը պրակտիկան դադարեցնելու մասին:

10. Պրակտիկան կասեցվում է տվյալ ուսումնական հաստատության համապատասխան գրության կամ Պրակտիկանտի դիմումի առկայության դեպքում:

11. Պրակտիկանտը չի կարող ոչ նպատակային օգտագործել Կոմիտեի նյութատեխնիկական, տեղեկատվական միջոցները, պետական այլ գույքը և ծառայողական տեղեկատվությունը, տարածել պրակտիկայի ընթացքում իրեն հայտնի դարձած տեղեկություն:

12. Եթե Պրակտիկանտն ուղղակի կամ անուղղակի շահագրգռված է պրակտիկայի ղեկավարի վարույթում գտնվող քրեական գործով, այդ մասին անհապաղ տեղեկացնում է պրակտիկայի ղեկավարին:



    III. ՊՐԱԿՏԻԿԱՆՏԻ ԻՐԱՎՈՒՆՔՆԵՐԸ

13. Կոմիտեի դեպարտամենտի արխիվում կարճաժամկետ պրակտիկայի ընթացքում Պրակտիկանտը.

1) իր հանձնարարությունների կատարման համար ստանում է անհրաժեշտ տեղեկություններ և նյութեր, ծանոթանում իրավական ակտերին,

2) խորհրդակցում է պրակտիկայի ղեկավարի  հետ, ստանում պարզաբանումներ,

3) մասնակցում է սահմանված կարգով Կոմիտեի դեպարտամենտի արխիվ հանձնվող փաստաթղթերի ընդունմանը,

4) մասնակցում է ընդունված փաստաթղթերի ուսումնասիրության, դասակարգման, պահպանության, կարգավորման և հանձնման գործընթացներին,

5) մասնակցում է Կոմիտեի դեպարտամենտի արխիվ հանձնված գործերի և այլ փաստաթղթերի հաշվառման, պահպանության ապահովման, համալրման ու օգտագործման աշխատանքներին,

6) մասնակցում է Կոմիտեի դեպարտամենտի արխիվում պահվող փաստաթղթերի տեղեկատու-որոնողական համակարգով աշխատելու գործընթացին,

7) մասնակցում է վարույթը կարճված կամ դատարան ուղարկված քրեական գործերի թվայնացված նյութերի էլեկտրոնային կրկնօրինակների տրամադրման գործընթացին,

8) պրակտիկայի ղեկավարին ցուցաբերում է տեխնիկական և կազմակերպական աջակցություն,

9) վարում է օրագիր (իր ուսումնական հաստատության կողմից սահմանված լինելու դեպքում):

14. Երկարաժամկետ պրակտիկայի ընթացքում Պրակտիկանտը.

1) իր հանձնարարությունների կատարման համար ստանում է անհրաժեշտ տեղեկություններ և նյութեր, ծանոթանում իրավական ակտերին,

2) պրակտիկայի ղեկավարի  հանձնարարությամբ ներկա է գտնվում քննչական և դատավարական գործողություններին,

3) խորհրդակցում է պրակտիկայի ղեկավարի հետ, ստանում պարզաբանումներ,

4) պրակտիկայի ղեկավարի  հանձնարարությամբ նախապատրաստում է դատավարական փաստաթղթերի նախագծեր,

5) ուսումնասիրում է քրեաիրավական և քրեադատավարական իրավունքի վերաբերյալ Հայաստանի Հանրապետության վճռաբեկ դատարանի, Հայաստանի Հանրապետության սահմանադրական դատարանի և Մարդու իրավունքների եվրոպական դատարանի  իրավական դիրքորոշումները,

6) պրակտիկայի ղեկավարին ցուցաբերում է տեխնիկական և կազմակերպական աջակցություն,

7) վարում է օրագիր (իր ուսումնական հաստատության կողմից սահմանված լինելու դեպքում):


  IV. ՊՐԱԿՏԻԿԱՅԻ ՀԱՄԱԿԱՐԳՈՒՄԸ ԵՎ ԳՆԱՀԱՏՈՒՄԸ

15. Պրակտիկայի անցկացումը համակարգում է պրակտիկայի անցկացման վայրի Կոմիտեի համապատասխան մարմնի կամ ստորաբաժանման պետը:

16. Պրակտիկանտի նկատմամբ տվյալ մարմնի կամ ստորաբաժանման պետի կողմից նշանակվում է պրակտիկայի ղեկավար: Երկարաժամկետ պրակտիկայի ղեկավար կարող է նշանակվել քննիչի պաշտոնում  առնվազն երեք տարվա ծառայության ստաժ ունեցող ծառայողը:

Մեկ պրակտիկայի ղեկավարի մոտ կարող է պրակտիկա անցնել առավելագույնը երկու Պրակտիկանտ:

17. Պրակտիկայի ղեկավարը.

1) ապահովում է պրակտիկայի անցկացման համար անհրաժեշտ պայմանները,

2) պրակտիկայի անցկացման նկատմամբ իրականացնում է անմիջական հսկողություն,

3) օժանդակում է Պրակտիկանտի մասնագիտական գիտելիքների խորացմանը, գործնական հմտությունների ձևավորմանն ու կատարելագործմանը, ըստ անհրաժեշտության՝ ապահովում է քննչական և այլ դատավարական գործողություններին Պրակտիկանտի ներկայությունը,

4)  հետևում է Պրակտիկանտի հանձնարարությունների պատշաճ կատարմանը,

5) միջոցներ է ձեռնարկում օրենքով պահպանվող գաղտնիք պարունակող նյութերին և փաստաթղթերին Պրակտիկանտի հասանելիությունը բացառելու ուղղությամբ,

6) Պրակտիկանտի կողմից թերացումներ նկատելու դեպքում բանավոր նախազգուշացնում է նրան, իսկ էական թերացումներ նկատելու դեպքում՝ այդ մասին զեկուցագրով տեղեկացնում է տվյալ մարմնի կամ ստորաբաժանման պետին:

18. Պրակտիկայի ղեկավարի կողմից գործուղման, արձակուրդի կամ այլ իրավական հիմքերով մեկ շաբաթից ավել տևող բացակայության դեպքում սույն կարգով պրակտիկայի ղեկավարումը հանձնարարվում է մեկ այլ ծառայողի:

19. Պրակտիկայի արդյունքներն ամփոփվում են պրակտիկայի ղեկավարի կողմից տրվող բնութագրում, որի ճշտության համար պատասխանատու է պրակտիկայի ղեկավարը:

Բնութագիրը ներկայացվում է պրակտիկան ավարտելուց հետո երեք աշխատանքային օրվա ընթացքում:

20. Բնութագրում նշվում է այն ստորաբաժանման կամ մարմնի անվանումը, որտեղ անցկացվել է պրակտիկան, Պրակտիկանտի կողմից ձեռք բերած գիտելիքների, գործնական հմտությունների, կատարած աշխատանքների, պրակտիկայի ղեկավարի հանձնարարությունների կատարման որակի, ցուցաբերած նախաձեռնողականության, կարգապահության և պարտաճանաչության վերաբերյալ տեղեկատվություն:

21. Պրակտիկան գնահատվում է սույն կարգով սահմանված բնութագրի հիման վրա՝ անբավարար, բավարար, լավ, գերազանց:

22. Կոմիտեի համապատասխան հանձնաժողովը երկարաժամկետ պրակտիկայի գերազանց գնահատված Պրակտիկանտին կարող է տրամադրել հավաստագիր:  Հանձնաժողովի կազմը հաստատում է Կոմիտեի նախագահը:

23. Հանձնաժողովի նիստին պրակտիկայի ղեկավարը ներկայացնում է Պրակտիկանտի բնութագիրը:

24. Հանձնաժողովը Պրակտիկանտին հավաստագիր տրամադրելու հարցը քննարկելիս հաշվի է առնում.

1) դատավարական փաստաթղթերի նախագծեր կազմելու ունակությունը,

2) իրավական հարցերի շուրջ կարծիքներ, դիրքորոշումներ հայտնելու ունակությունը,

3) պրակտիկայի ընթացքում ցուցաբերած նախաձեռնողականությունը, կարգապահությունը և պարտաճանաչությունը:

25. Անհրաժեշտության դեպքում հանձնաժողովը կարող է հարցեր ուղղել Պրակտիկանտին: